वीरगंज, ४ माघ ।
जिल्ला प्रहरी कार्यालय, पर्साले अपहरण तथा डाँका गर्ने तीनजनालाई पक्राउ गरेको छ ।
पर्सा वीरगञ्ज म.न.पा.वडा नं १५ निवासी सुमन श्रेष्ठ (२० वर्ष), बिकाश थापा मगर (१८ वर्ष), रमेश कुमार साह सोनार (२० वर्ष) लाई पक्राउ गरिएको प्रहरीले जनाएको छ ।
माघ ४ गते विहान ९ बजे जिल्ला पर्सा वीरगञ्ज महानगरपालिका वडा नं १५ बसपार्कस्थित भानुचोकमा पोखराबाट आएका बारा, सिम्रौनगढ नपा वडा नं ७ पर्सा टोला बस्ने वर्ष २३ का माजिद अंसारीलाई अपहरण तथा लूटपाट गरेको आरोपमा उनीहरुलाई पक्राउ गरिएको प्रहरीले जनाएको छ । बिरामी भई सडक छेउमा बोल्न नसक्ने अवस्थामा बसिरहेका अंसारीलाई तीनजनाले नियन्त्रणमा लिई ना२ ह २७३६ नं. को अटोरिक्सामा चढाई लगिरहेको अवस्थामा प्रहरीले उनीहरुलाई पक्राउ गरेको हो ।
अंसारीको मोवाइल फोन र नगद समेत लुटेर अर्धचेत अवस्थामा वीरगंज १५ प्रतिमाचोकस्थित सडकछेउमा छोडेको अवस्थामा प्रहरीले तीनैजनालाई पक्राउ गरी अपहरण तथा डाँका सम्बन्धी कसूरमा अनुसन्धान भइरहेको प्रहरीले जनाएको छ ।
प्रतिक्रिया लेख्नुहोस्